ຄະນະກຳມາທິການ ຕາງໜ້າຜູ້ໃຊ້ແຮງງານ ແລະ ອຸດສາຫະກຳ ເຂົ້າຮ່ວມ "ພິທີເຊັນບົດບັນທຶກຄວາມເຂົ້າໃຈ ການຮ່ວມມື ລະຫວ່າງ ສະຖາບັນພັດທະນາ ອາຊີວະສຶກສາ (ສພອ)
ຈັດຂື້ນໃນວັນທີ 03 ກໍລະກົດ 2024, ທີ່ ຫ້ອງການ ສະພາການຄ້າ ແລະ ອຸດສາຫະກໍາແຫ່ງຊາດລາວ, ໄດ້ມີພິທີເຊັນບົດບັນທຶກຄວາຍເຂົ້າໃຈການຮ່ວມມືລະຫວ່າງ ສະຖາບັນພັດທະນາອາຊີວະສືກສາ ແລະ ສະພາການຄ້າ ແລະ ອຸດສາຫະກຳ ແຫ່ງຊາດລາວ ຕາງໜ້າ ໂດຍ ຮສ ປອ. ບຸນເສັງ ຄຳມຸນຕີ, ຜູ້ອຳນວຍການ ສະຖາບັນພັດທະນາອາຊີວະສຶກສາ ແລະ ສະພາການຄ້າ ແລະ ອຸດສາຫະກຳ ແຫ່ງຊາດລາວ (ສຄອຊ) ທ່ານ ພູໄຊ ເທບພະວົງ, ເລຂາທິການ ສະພາການຄ້າ ແລະ ອຸດສາຫະກຳແຫ່ງຊາດລາວ ໂດຍໃຫ້ກຽດເຂົ້າຮ່ວມຂອງ ທ່ານ ທອງສາ ອີນທະວົງ, ຮອງຫົວໜ້າກົມອາຊີວະສືກສາ, ກະຊວງສືກສາທິການ ແລະ ກິລາ, ທ່ານ ປອ. ໄຊບັນດິດ ຣາຊະພົນ, ຮອງ ປະທານ ສຄອຊ, ມີແຂກຖືກເຊີນເຂົ້າຮ່ວມ ຈາກ ກົມອາຊີວະສຶກສາ, ໂຄງການພັດທະນາອາຊີວະສຶກສາ ສປປ ລາວ (GIZ-VELA Project), ກຸ່ມ-ສະມາຄົມທຸລະກິດ, ສະຖາບັນການສຶກສາ, ສະຖານປະກອບການສະມາຊິກ ແລະ ຄະນະບໍລິຫານງານ ສະພາການຄ້າ ແລະ ອຸດສາຫະກຳ ແຫ່ງຊາດລາວ, ຕາງໜ້າຈາກວິທະຍາໄລເຕັກນິກວິຊາຊີບ, ທີມງານຄູຝຶກ ຂອງສອງພາກສ່ວນ ເຂົ້າຮ່ວມເປັນສັກຂີພະຍານໃນການເຊັນບົດບັນທຶກໃນຄັ້ງນີ້.
ໃນນີ້ ຜູ້ອຳນວຍການ ບໍລິສັດ ພິນິມໂປຣ ຈຳກັດ ໂດຍທ່ານ ບົວລຽນ ວົງສີສຸດພັນ, ກໍໄດ້ຖືກເຊີນເຂົ້າຮ່ວມ ໃນນາມ ຄະນະກຳມາທິການ ຕາງໜ້າຜູ້ໃຊ້ແຮງງານ ແລະ ອຸດສາຫະກຳ, ສະພາການຄ້າ ແລະ ອຸດສາຫະກຳ ແຫ່ງຊາດລາວ.
ຈຸດປະສົງ ຂອງການຮ່ວມມື ເພື່ອກຳນົດຂອບເຂດການຮ່ວມມື, ແລກປ່ຽນຂໍ້ມູນຂ່າວສານ, ຮ່ວມກັນ ສ້າງມາດຕະຖານຄູຝຶກແຫ່ງຊາດ, ສ້າງຫຼັກສູດ ແລະ ຝຶກ ຄູຝຶກສະຖານ ປະກອບການ ໂດຍອີງໃສ່ມາດຕະຖານອາຊຽນ ແລະ ສາກົນ ເພື່ອສົ່ງເສີມວຽກງານອາຊີວະສຶກສາໃນ ສປປ ລາວ.
ຂອບເຂດ ການຮ່ວມມືປະກອບມີບັນດາກິດຈະກຳຕ່າງໆດັ່ງນີ້:
1. ສ້າງມາດຕະຖານຄູຝຶກສະຖານປະກອບການແຫ່ງຊາດ
2. ພັດທະນາຫຼັກສູດ, ຊຸດຝຶກອົບຮົມ ແລະ ຝຶກ ຄູຝຶກຕົ້ນແບບ.
3. ຝຶກ ຄູຝຶກສະຖານປະກອບການ
4. ສົ່ງເສີມ ແລະ ແລກປ່ຽນຂໍ້ມູນຂ່າວສານກ່ຽວກັບການຈັດການຝຶກອົບຮົມ ຄູຝຶກສະຖານປະກອບການ ຢ່າງເປັນປົກກະຕິ.
5. ສົ່ງເສີມການຮ່ວມມືລະຫວ່າງ ສະຖານປະກອບການ ແລະ ສະຖານອາຊີວະສຶກສາ ໃນການຈັດຕັ້ງການຮຽນ-ການສອນແບບຄວບຄູ່.
6. ຮ່ວມກັນ ອອກໃບຢັ້ງຢືນການຝຶກອົບຮົມ ຄູຝຶກສະຖານປະກອບການ ທີ່ສໍາເລັດການຝຶກອົບຮົມ.
